Rabu, 13 Agustus 2014

ISLAM SE DARAH


Assalamualaikum Warahmatullah,
Jaroe dua blah nyengna bak tuboh,
Kadang hana roh wate lon ba kisah,
Silap ngen salah meuah rakan beh.

Saleum pembuka awai lon peuhah,
Supaya nak ceudah haba lam ratoh,
Sigalom takayoh keutangen tapandrah,
Kadang cit reubah bhan jih beureutoh.

Keu-eung campli teurasa bak lidah,
Keu-eung lam babah wate tapajoh,
Lam Gule Reuboh na bayam mirah,
Leumak kuwah na engkoet teucroh.

Didalam rateb Taseubut ALLAH,
Kalimah Taybah takeun beusunggoh,
Taseurah tuboh kepada Poe teu ALLAH,
LAILAHAILLALLAH BEKNA TOM PUTOH.

Tasimpan beugot lembaran seujarah,
Mahligai indah bek sampe runtoh,
Dari hama tikoh ngen gigitan lintah,
Beurela darah jile bak tuboh.

Agama islam lembot ngen tabah,
Sifeut Rasulullah geubie peunutoh,
Beuthat pih musoh Islam dijajah,
Bekna rasa gundah JIHAD beusunggoh.

Tapinah beuji-oh Nafsu Amarah,
Tapinah beubagah bekle na lam tuboh,
Bek le takiroh sinoe dalam Daerah,
Tanyoe tengoh dijajah jabren dari ji-oh.

Peu-peu nyeng sanggop tabie seudekah,
Peu-peu nyeng mudah seulaku tuboh,
Asal bek rapoh teukanceng bak  lidah,
Tan sapeu peugah teu-iem dikeurupoh.

Islam sedunia laksana sie darah,
Cit saboh Ka’bah lam rangka tuboh,
Trageudi putoh geulinyueng siblah,
Oh ban roe Darah na jaroe yg sampoh.

Merpati terbang jiwoe u meukah,
Jiebeudoh tiwah jiwoe u Meulaboh,
Wate berlaboh beumeusahoe Arah,
Bek meula-en Arah wahe rakan Beh.

ALLAH YA-SALAM ALLAH YA-MUHAIMIN,
ALLAH YA - KAWI ALLAH YA - MAJID,,,
BEUTALOE MAKSIT BEUMEUNANG TAAT,,
NEUBRIE BEUSELAMAT KAOM MUSLIMIN
.
OLEH : MUKHTARUDDIN, S.Sos

13 Agustus 2014