AKANKAH TANYOE MUENYEUSAI 'OH WATEE SUKRET (Sya'ir Aceh)

Akhbar Al-Mutawassila

Assalamu'alaikum, ayyuhal ikhwan
Inong ngon agam, jamak lon sapa
Tapujoe Allah, nyang Maha Rahman
Keu Nabi khatam, Rahmat Sijahtra

Meusoe nyang galak, nibak nonton bhan
Dak teungoh malam, laju meujaga
Didalam rika, wahee e taulan
Ca-e peringatan, bacut lon seuba

Hudep geutanyoe, lam bumoe Tuhan
Nibak saboh jan, jawoeng keulua
Saleh pih uroe, atawa malam
Troek janji Rabban, 'Izrail teuka

Hanjeut peu iseuk, atau lambatkan
Nyan keutentuan, laju tarasa
Hana geubida, rakyat ngon sulthan
Puteh ngon itam, tuha ngon muda

Jai that-that ureung, Guree khabarkan
Bak sukret sinan, meunyesai raya
Na nyang ladoem, pinta bak Tuhan
Lakee kesempatan, geuneuk 'amala

Geuneuk seureukah, infaq dan Qurban
That keinginan, bantu fuqaha
Keu aneuk yatim, harok watee nyan
Geubri santunan, ubit ngon raya

Teuma nyan laen, lom seubahgian
Na ladoem 'abdan, nyang Hoby bola
Geuneuk tadarrus, baca quru an
Dan shalat malam, zikir pih beuna

Geukeumeuk jak beut, laen lom si"man"
Hajat digobnyan, asoe masjida
Sabee jama'ah, bek ketinggalan
Meuwoe keu si"man", hudep sederhana

Teuma nyang carong, luwah pemahaman
Meunyesai gobnyan, tan bagi 'ilma
Takot yoeh awai, sama kepandaian
Geu seumbunyikan, geubagi hana

Di Ahli maksiet, dan kesalahan
Judi ngon khamran, beserta Zina
Meunyesai that-that, lakee bak Rabban
Geuneuk lakukan, Taubat Nashuha

Nyang cinta harta, nibak masa nyan
simpanan bak Bank, intan - permata
Geukeumeuk publoe, bandum atra nyan
Geuneuk infaqkan, jalan agama

Takot nyoe tinggai, diperebotkan
Lee aneuk gobnyan, agam ngon dara
Lee that lom laen, meunyesai datang
Bila hai taulan, lam donya lagha

Ca-e lon tuleh, cuma bayangan
Maksud lon tuan, peugoe syedara
Sigohlom tanyoe, alami meunan
Kana persiapan, 'oh sukret teuma

Hanapu 'ujub, harta meukuyan
Haji hai rakan, tan peurlee bangga
Infaq seudeukah, bek tasiarkan
Beserta qurban, bek ta seuranta

Nyang ka tapubuet, uroe ngon malam
Ta niet lam qalban, Lillahi ta'ala
Bek gara-gara, gugor amalan
Meunyesai teuman, soe tulong hana

Meumada 'oh noe, ca-e lon karang
Pat keusalahan, neupeugah sigra
Tanyoe meulakee, jeut peringatan
Asoe didalam, jeut tapeu makna