BATEI GIOK

oleh Sudirman

Ticem meunari ateuh bak kayei,
Pajoh boh jambei nyeng ka got masak,
Wahe rakan lon keuno ju ile,
Tapeugot lagei jeut mangat ramphak,

Nyengna di gampong atau di keudei,
Mandum peureulei keuno ju tajak,
Nyeng jak ulaot jak kawe suree,
Atau bak lampei publo boh salak,

Nyeng meukat sabon ngen eungkot kasee,
Nyeng meukat sabee inan di langkak,
Nyeng meukat ranup seureta gulei,
Seureuta tempei geuba ngen becak,

Nyeng meukat kueh deungon ie teubei,
Ka geujak me mei deungon geureubak,
Meukat es campur jampu es batei,
Nyeng meukat bajei seureuta rujak,

Ino di nagan nyeng saboh lagei,
Masalah batei cukop that ramphak,
Banbandum ureung ka abeh lalei,
Teumasok kei-kei turot na kujak,

Makwa po kasom riyoh tip watei,
Karena lungkei gobnyan abeh phak,
Ka abeh diphok oleh meulintei,
Oh geu eu lagei cutpo sep palak,

Jino that rame ureung keunan meurei2,
Bak asah batei meulagak-lagak,
Kasapu pakat tuan ngen meulintei,
Hanale malei nyan keuh dum galak,

Na batei giok meumacam modei,
Dua deungon lheei lon ujo ceiplak,
Kudengoe2 gob kheun nan batei,
Ku ujoe tirei kurawak-rawak,

Meunyoe indogres rame peureulei,
Solar pih teuntei ramei nyeng galak,
Nyo badal besi hitam meuteuntei,
Dua ploh ribee yum saboh petak,

Meunyoe nyeng neprid cit tan soe lakei
Padahai bak kei rap saboh becak,
Ulon peutaba rata jeut keudei,
Ka bulut bajei dilon bak kujak,

Jeh dileun rumoh sibak bak jambe,
On nyeng kalayei duroh diyub bak,
Nyo bak kupikei sang ka heng ulei,
Haba meugesei leh ho meusawak,

Maksud kupeugah dilon e keumbei,
Bakbut meubatei ckop that ramphak,
Hasei bak publo meureutoh ribei,
Jeut tablo bajei nyeng tan keulepak

Cuma lo agam nyeng manteng balei,
Asoe peunangkei golom dibawak,
Padahai umu karap lhei ploh lhei,
Glom meuteume pajoh mertabak,

Katimoh janggot keuriteng misee,
Golom Tacom bei boh panah masak,
Yoh manteng peungeuh cahaya sentei,
Boh drien nyeng meubei talhoh diyub bak

Cabeung jih tupat ateuh bak mane,
Teumpat meu adei siticem merak,
Nyoe keumeu meukawen hana jeulame,
Bek male-male talake bak pak,