ULANG TAHUN TSUNAMI

Sudirman

Allahu Allahurabbi,
Syukur keurabbi sidroe ilahon,
Selaweut saleum sabee bak bibie,
Keusidroe nabi utusan rabbon,

Nibak malam nyoe lon peugot rawi,
Ya Allah neubi beutrang hatee lon,
Ngen tuah gure lam ulee leupi,,
Keubhah stunami lon ujo suson,

Yoh buno uroe tapeuringati,
Saboh tragedi geu ulang tahon,
Saboh seujarah Aceh seurambi,
Dile terjadi kheundak bak rabbon,

Yoh golom damai gam deungon R.I,
Manteng su minimi di gle ngen gampong,
Rakyat sengsara geuklik meu ie’ie,
Bak ujong gaki adat ngen hukom,

Hingga troh masa kuasa rabbi,
Saboh tragedi nibak akhe thon,
2004 ngen thon masehi,
Cobaan neubi bala neupeutron,

Bak beungoh minggu geumpa teujadi,
Meugokgok bumi donya meu hayon,
Tanoh dum crah-crah di tubit ngen ie,
Reuloh ngon titi runtoh ngen geudong,

Wate kareuda geumpa terjadi,
Sideh di pasi asai mula phon,
Di beudoh bakat Allah hurabbi,
Leupah that tinggi santeut ngen geudong,

Teuka geulumbang raya han sakri,
Mulai di pasi banbadum di ron,
Rumoh ngen toko warong meukat mie,
Ngen moto mersi geulumbang gulong,

Kuasa Allah hantroh takaji,,
Oh wate geubi han ek tatanggong,
Barang dum di ba oleh stunami,
Ureng dalam ie meu apong-apong,

Wate taingat seudeh hansakri,
Didalam hati teurasa tutong,
Wte takalen oh di surot ie,
Mayet meuriti kota ngen gampong,

Hate sang diklik mata sang me ie,
Oh ta peurati tamoe taranggong,
Jino takeunang ultah stunami,
Taperingati doa bak rabbon,

Smoga arwah korban stunami,
Beu ek Allah bie syuruga lambong,
Pahala syahit be ek Allah bie,
Ahli famili dan bandum kaom,

Dengon momentum ultah tsunami,
Umat islami ingat keurabbon,
Di dalam hudep pareksa diri,
Iman lam hati tanyo peubeutoi,

Meumada ohno lon undur diri,
Soal tsunami nyeng jeut lon suson,
Mgken golom jeut lon peugot rawi,
Meauh beu tabi wahe dum kawom,

Ticem di meulot ateuh bak jawi,
Ticem keudidi pajoh boh sukon,
Sekedar haba nyeng jeut lon rawi,
Ulon akhiri wassalamialaikom.

Atadroe Mukhtar

 Alahai adun cutbang puteh di,
Aceh serambi geulombang gulong,
Kana siploh thon tapeuringati,
Jinoe keula-i kabak akhe thon.

Meuah lon lake teulat ku ili,
Dalam meuseni tanyo meupanton,
Hajat lam hate keuneuk meurawi,
Tuk tareunungi tip tip troh bak thon.

Baroe yoh jum'at mandum geubagi,
Naskah geukopi na meupadup oen,
Keupada khatip geuyue kabari,
Asoe lam isi rata jeut dusoen.

Panton diateuh seudeh sekali,
Glombang tsunami raya that gulong,
Lam ibu kota kajeut keupasi,
Kahana le meri rimba ngen duson.

Semoga tanyoe mandum insani,
Yang domisili tinggal di gampong,
Tacok ikhtibar yg ka terjadi,
Tuk perbaiki sepanjang tahon.