Demam Keu Euncin GIOK

Sudirman

<b>Tajak ek ugle takoh bak ara,
Takoh nyeng raya taplah keubalok,
Jino hai wareh tae u dum nyata,
Di nagan raya leupah lo giok,

Rab sithon leubeh Aceh Berjaya,
Dithei ulua trok nanggroe Bangkok,
Tanoh aceh nyoe keubit2 kaya,
Meubagoe rupa hasei jeut tacok,

Dari minyeuk gah trok batu bara,
Meuh pih sereuta lo that jeut tacok,
Hingga oh jino nyeng leubeh gura,
Ureng dum kaya ngen hasei giok,

Sidroe-droe tumei ube-be raya,
Ploh reutoh juta lheuh toke jak cok,
Nyeng ladom-ladom jeut bloe avanza,
Mendadak kaya wap batei teuphok,

Tetapi dilon nyeng sedih raya,
Teubit ie mata ile meu bhok2,
Oh ku kalon gob ube-be raya,
Euncik meumata rap be2 tukok,

Disok bak jaroe rab ube bola,
Oh wte diba baho ka suyok,
Blah Uneun peut blah wie 4 mata,
Meukilat cahya kalheuh meugeusok,

Nyankeuh seubabnyan seudih diteuka,
Seubab lon hana pat kucok,
Kahek lon mita udalam rimba,
Kahek lon raba rata jeut alok,

Hana meutume meu ube lada,
Tansoe peutaba meu ube pitok,
Meupeng pih hana ngen ulon tuka,
Hase keureuja sep-sep keu rukok,

Peu nyeng lon tume ulon sok sigra,
Lage bak gamba tae u that cocok,
Nyan keu dum dilon di teuka hawa,
Boh limeng makha sineuk ulon cok,

Jino bak jaroe lon ikat sigra,
Oh gob peunyata dikhem oh dok2,
Nyeng keuh dum rakan jino lon rasam
Demam asmara dilon keu giok,

Meumada ohno kisah lon buka,
dak takheun gila di lon ka harok,
nyo laen ureng laen seulera,
memacam cara ureng meulawok,

nyo keuh euncin nyeng that meuharga,
dak lake tuka han sagai kucok,
nyo nyeng asli sang hana dua,
supot Barossa di yub bak lon cok,

lon tuleh cae malam kajula,
nyo aneuk mata tae u ka gekgok,
karena singoh ulon kereuja,
kasep meumada haba lon pacok