PEUNAYAH LAKOE

Sudirman

4 Mei pukul 14:54

Lon peuphon kalam deungon bismillah,
Ngen nama Allah sabee lon pujoe,
Nibak uroe nyoe ulon keumisah,
Bacut masalah ulon neuk rampoe,

Seureng terjadi dalam sejarah,
Rame gob peugah si uroe-uroe,
Ulon meurika nyata na kisah,
Hate bek beukah nyeng meurasa droe,

Beuna taingat ee putroe ceudah,
Yoh phon meunikah gata ngen lakoe,
Bandum lam donya teurasa indah,
Hudep that cerah oh ka meusahoe,

Hana nyeng laen bak sang meugah,
Han le teupisah gata ngen lakoe,
Rasa bahgia han meupat peugah,
Bahgia meutamah malam ngen uroe,

Lheuh nyan inong nyoe lakee kuliah,
Haba di peugah laju bak lakoe,
Gelar S,Pd meucok ijazah,
Gelar nyeng meugah beuna lam jaroe,

Dak na peluang geubi le Allah,
Ohna ijazah bagah tapasoe,
Mungken raseuki tuhan bi iradah,
Hudep han sosah singoh oh dudoe,

That got geudeungoe lakoe meutuwah,
Hate that luah galak han bagoe,
Geugumpoi ngen peng peusaho bagah,
Maksud kuliah jeut bagah sampoe,

Di jak keureuja reu oh ngen reu ah,
Jak mita upah rata jeut sagoe,
Selaen geukira beusep nafakah,
S.P.P kuliah pih geupeusahoe,

Coba tabayang pakiban sosah,
Kerja tung upah lam tarek uroe,
Bak demi inong geumita ilah,
perle kuliah banmandum geubloe,

singkat cerita didalam kisah,
jino kuliah pih ka seuleusoe,
oh titel sarjana kana ijazah,
meubalek arah teuma oh dudoe,

percuma manteng tajak drop tiwah,
oh lheuh bak geutah lam awan dipoe,
lam angan-angan harapan arah,
tapi tan indah lage lam lumpoe,

nibak taharap dakjeut beu ek glah,
hudep beu ek pah trok uroe dudoe,
tapi oh akhe ka hana jeulah,
ka roh teulangkah udalam duroe,

percuma mantong gulei lou kuwah,
waten taruwah ka hana asoe,
percuma manteng caroeng kuliah,
but hana le pah meutamah kacoe,

keu ureung kira nyeng bi peunayah,
jino ta ludah gata peu tuwoe,
tatem koh taloe hubungan ka sah,
laen ta ta ilah nyeng hana meusoe,

ureung meujasa takeumeung keubah,
cinta ta ubah keu nyeung na motoe,
tanle taboh yum meu ube keurtah,
durhaka leupah gata keu lakoe,

selingkuh gata kaya ngen meugah,
udep that mewah motoe bak jaroe,
dijak tung gata oh jak kuliah,
seunang sileupah tajak ngen tawoe,

lakoe dirumoh hate meudarah,
diteuka susah mlm ngen uroe,
pijut ngen tuboh awoh meuleupah,
lam hate gundah ingat keu putroe,

wap seubab payong tuboh han basah,
sehingga leupah urumoh tawoe,
wap seubab lakoe gata kuliah,
oh na ijazah gata meubagoe,

jino tapike secara warah,
bek sampe teulah gata oh dudoe,
peulom pih kana si buleun peut blah,
hasee meunikah gata ngen lakoe,

pakiban nasib aneuk meutuwah,
nyo tameu pisah gata ngen lakoe,
peulom pih manteng ubit meuleupah,
goh meupat arah laba ngen rugoe,

korban ngen aneuk nyo tameupisah,
seudeh sileupah han meuho sahoe,
oh diwoe bak ma kahana ayah,
di jak bak ayah hana poma droe,

wate tapike hate sang beukah,
ie mata basah ile meutaloe,
ingat keu aneuk mantong that mirah,
sapu galom glah kereuja keudroe,

wahee adoe lon sibuleun peut blah,
deungo lam kisah peusan lon rampoe,
ube2 nyeng jeut wajeb lon peugah,
saboh amanah bek smpe tuwoe,

hudep lam donya ingat keu Allah,
ta sujud sembah sabee tapujoe,
tapubut suroh peu jioh teugah,
nyeng larang Allah meubek tapeutoe,

bak ureung inong taingat beupah,
ohlheuh meunikah taat keulakoe,
wajeb bak gata lakoe tapah-pah,
dak ta ibadah gata han rugoe,,

dalam Al-qur an kalheuh geusurah,
syuruga indah yub gaki lakoe,
amanat lakoe hanjeut tabantah,
hanjeut meutuwah kiban galak droe,

kodrat di gata disisi Allah,
mulia leupah wahe e putroe,
peulom nyo tatem pujo keu Allah,
inong salehah bakti ke lakoe,

singoh Allah Jok Syurga nyeng luah,
rahmat geutamah sabee tib uroe,
kaseb keuh dile ulon ba kisah,
meunyo na salah lon beu ot jaroe

Atadroe Mukhtar

 Lewat rot lagu cutbang mekisah,
Saboeh seujarah isi geu pasoe,
Lei sidroe lakoe geubie kuliyah,
Geutem meususah kerja tib uroe.

Tujuan lam rika kameuhoe arah,
Kameuhoe curah asoe lam rampoe,
Setia lakoe geutem meususah,
Yg penteng kuliah istri beusampoe.

Kpl rumoh tangga yg bi nafakah,
Yg bi peunayah getangog le lakoe,
Tapi oh dudoe lake meupisah,
Oh tamat kuliah titel ka lam jaroe.

Cukop that sedeh wate tapeugah,
Haba takisah tadingo pi keudroe,
Lage nyan bagoe budi dibalah,
Jiteuka icah roeh takap igoe.

Aloen geuputa rika geu unggah,
Nyata lam kisah anggota grop rampoe,
Beumangat asoe hate bekle gundah,
Semga betabah wahe adun droe.

Cukop dua tanyoe yg tepue celah,
Membek tapeugah nibak ureg poe,
Menyoe Atadroe tetap ku mita ilah,
Nyan masalah dakjeut beuselesoe.

Doa kamoe lake kpda poteuAllah,
Yg ka neusinggah nibak hamba droe,
Beumangat asoe hate bekna gundah,
Aneuk metuwah tatinggai bak lakoe.

Hafidz Kom Puter 

Boh U jahet Jinoe ka beukah,
tinggai capah ngon pireng kanso.
Tinggai kulet dengon U siblah,
ie dalam glah ta kaloe cikoe.

Uloen sambong ngon kalam Allah,
ngon ilme Fikah biok loen Ujoe.
Ngon lafat jais biok loen peugah,
Nibak nyo kisah dari adun Dro.

Cukop that phet oh akhe kisah,
Cukop Inayah bak ujong rampo.
Cukop meu bisa ake ji Ludah,
Cukop that reuah oh ake dudo.

Loen ucap kalam Nau' zubillah,
Inong meutuah man rimung tampo.
Iman lam dada hana ji peuah,
Iman keu Allah hana ji pakoe.

Lam hadis nabi biok Lon surah,
Inan geu peugah wahe e Cut poe.
Dosa bak lakoe cukop that parah,
Syuruga Indah han peu ta lumpo.

Bak tapak lako beu tatem sembah,
Tacom meutuah bek ta pgot dro.
Sebab lakoe sep apoeh apah,
geubi nafakah neupu dum geublo.

Bacut amanah biok loen Olah,
keu inong cedah iman ta pasoe.
Bek ban titel gata sep meugah,
laju meutuah than harga lakoe.

Di kamoe agam jujur sileupah,
bak bi nafakah ingat tuboh dro.
Bek banjeut na sikreh mirah,
laju neu ludah neutik bak sago.

Wahe rakan yg ka neu langkah,
biok loen Ruah nibanyoe uroe.
Nyak samong hba yg ka lapah,
cukop that indah rika neu rampo.

Di uloen tuan rap apoh apah,
bak pike kisah dari adun droe.
Mk keu teuka keuno ku langkah,
biok risalah bek sampe kacoe.

Ingat keu jalo kayoeh peunerah,
Ingat keu leupah kayoh bak rabo.
Ingat keu jasa yg ka meu keubah,
Ingat Keu aLlah bek sagai tewo.

Keupu arti gata neu gagah,
rupa cedah maksit keu lako.
Hen ta tume com syurga indah,
han teume langkah tuboh neu kuto.

Kasep dile haba loen peugah,
nyona salah meuah e cutpo.
Nyoen narit bak lon meu kisah,
Jino meu tuah ulon com jaro.

Irwan Nagaya 

Dengen bismillah pujo ke allah,
rahmat nelimpah bak sigom negro,
haba peu ingat ckoup that indah,
nyankeuh faedah tanyo mesaho,

neu inong2 ta baca bepah,
cok keu sejarah oh teina lako,
bek oh na ayan ka hanlei capah,
oh gata megah tuwo keu lako,

di kamo agam bit cukoup sosah,
mita nafakah malam ngen uro,
oh lheuh mu u blang mejak semeplah,
ngat jeut bek sosah di tuan putro,

ladoum meu ek u mejak tu upah,
ileweu bekah ka tepluk jaro,
na cit neu ladoum mejak si getah,
trouh lam2 bah ie getah ipo,

na pgot honda na neu semelah,
neu hek silepah semen di cawo,
demi keu inong aneuk metuah,
dak tebit darah hana mehiro,

oh tei na lako mandum metuah,
begot ta pah2 malam ngen uro,
bek oh tei bengeih aju neu capah,
abeh meruh dum igo lako,

neu agam2 pih dengo bepah,
bek kheim meu hah2 tan kenong kedro,
bek oh ka lou peing neu moto mewah,
inong metuah bek ta petuwo,

cukoup lou ta eu jno that jelah,
asai hi kaglah cit ka mebago,
ban peng pih ka lou mto that mewah,
aju meu olah inong di ganto,