LAWET NYOE

Akhbar Al-Mutawassila

Meungnyoe meu-aneuk, jeut barangkasoe
Beuna Ta hiroe, nak jeut meuguna
Keupada Allah, beuna jitusoe
Meubek meucawoe, hudep lam donya

'Oh watee jibang, beutingat keudroe
Dijak pujoe poe, ateuh Mushalla
'Oh watee shuboh, han suwah pugoe
Ka meuphoem keudroe, teupu agama

Sayang sep sayang, ladoem aneuek droe
Hudep lam bunoe, meuleumpah gura
Beu-oe dijak beut, ubak guree droe
Mangat greng jaroe, bak gitar Tuha

Ladoem takalon, bak masjid tan toe
Kayeem meusahoe, bak panteu jaga
Dikhem meuhah-hah, sabee keu droe-droe
Gadoeh jirampoe, haba tan guna

Komentar oleh :

Atadroe Mukhtar 

Beutoi hai aduen lage neu sampoe,
Lage lam rampoe neurangkum kata,
Takaloen nyata sinoe lam nanggroe,
Yg meunan bagoe ramei dikerja.

Bunoe diberanda na lon pantoe,
Rata geupupoe nasehat geuba,
Keu aneuk bangsa kageutem pakoe,
Geuyu ingat droe bek sampe lupa.

Syukur keu Tuhan ureng tapujoe,
Allah teuh sidroe yang maha Esa,
Dilon that bangga mangat lam asoe,
Oh troh meusahoe tgk mutawasila.

Talake doa malam ngen uroe,
Moga lam nanggro aman sntosa,
Hudeh meu bahgia keu Allah tapujoe,
Tajaga aneuk droe didikan beuna.

Dalam peupatah haba geupasoe,
Kheun ureung mesoe haba ureg tuha,
Pakiban kadra sifeut ureng cik droe,
Meunan oh dudoe di ikoet sigra.